Si Fermin Eusebio Jimenez ay isang guro, beterano ng U.S. Navy, at matagal nang lingkod-bayan na tumatakbo para sa Sweetwater Union High School District Board of Trustees, Area 1.

Lumaki sa South Central Los Angeles, natutunan ni Fermin ang halaga ng edukasyon, oportunidad, at suporta ng komunidad. Sa edad na 17, pumasok siya sa United States Navy bilang isang Hospital Corpsman at dito nagsimula ang kanyang dedikasyon sa serbisyo. Dinala siya ng kanyang karera sa militar sa San Diego noong 2007, at matapos ang aktibong tungkulin, pinili niyang manirahan sa South Bay.

Ipinagpatuloy ni Fermin ang kanyang pagsisilbi bilang sibilyang empleyado na sumusuporta sa militar bago naging isang guro. Ang kanyang karanasan sa loob ng silid-aralan ay nagbigay sa kanya ng malalim na pang-unawa sa mga hamon na kinakaharap ng mga estudyante, guro, at pamilya, pati na rin ang kahalagahan ng pagbibigay ng sapat na yaman at suporta sa mga guro para sa tagumpay ng kabataan.

Nagtapos siya ng Bachelor's degree sa Political Science mula sa San Diego State University at Associate degree sa Paralegal Studies. Ipinagpapatuloy niya ang kanyang pag-aaral sa antas ng graduate na nakatuon sa Critical Literacy, Social Justice, at Dual Language education.

Nagsisilbi rin si Fermin bilang Vice Chair ng National School District Bond Oversight Committee, kung saan itinataguyod niya ang katapatan at pananagutan sa paggamit ng pondo ng bayan.

Tumatakbo siya para sa Sweetwater Union High School District Board dahil naniniwala siyang bawat estudyante ay karapat-dapat sa pagkakataong abutin ang kanilang mga pangarap. Kasama sa kanyang mga prayoridad ang pagpataas ng antas ng edukasyon, pagsuporta sa mga guro at kawani ng paaralan, pagpapalakas ng landas patungong kolehiyo at karera, pagsasaayos ng pasilidad ng paaralan, pagpapalawak ng ugnayang pangkomunidad, at paniniguradong maayos ang paggamit ng buwis.

Para kay Fermin, ang pampublikong edukasyon ay hindi lamang para makapagtapos ang mga bata. Ito ay tungkol sa pagbibigay sa mga kabataan ng kaalaman, kumpiyansa, kasanayan, at oportunidad na kailangan nila upang bumuo ng matagumpay na kinabukasan at patatagin ang kanilang mga komunidad.